最近有件事好想同大家分享
話說有個六十幾歲嘅病人住咗院都一段長時間，一直見住佢越黎越差，身上插嘅喉越黎越多🤐
無奈因為疫情關係好似無乜屋企人探，但其實由頭到尾除咗知道佢有個老婆同一個五歲大嘅仔之外，完全唔覺有佢有其他屋企人
直到早幾晚我返夜，病人情況已經急轉直下，醫生即刻打電話畀佢老婆叫佢黎見下佢
(P.S. 有特別情況同條件下係可以恩恤探訪)
佢老婆黎到見到病人情況咁差就即刻喊得好淒涼
但個小朋友應該仲未知發生咩事😣
仲好天真咁問「媽媽你要唔要抹下眼淚呀？」
見到都覺得有啲心酸🥲
然後病人好多嘅屋企人都陸陸續續黎到，呢一刻我先知原來佢有好多兄弟姊妹
佢哋逐個逐個探完之後，同我講想知道病情
因為病人嘅病歷都相當長，為咗有效率地講我就問佢哋知道幾多
點知佢哋答我完全唔知咩事🤯我係有少少震驚🤯但人哋嘅家事係點我唔清楚所以都唔comment🤐咁我就由頭到尾講一次畀佢哋知
因為都深夜，探哂之後病人老婆同佢啲屋企人就走咗
我千叮萬囑佢老婆今晚都要留意電話，因為我覺得病人好大機會今晚就會離開
去到半夜，不出我所料病人已經差唔多唔得了，我就即刻打畀佢老婆，但打左勁多次都無人聽！！！我又唔想佢哋見唔到病人最後一面，所以再打哂畀病人全部屋企人（因為啱啱探病有留低電話）結果都係完全無人聽！！！
我隔一陣就打一次電話，終於打咗勁耐佢老婆就聽電話，我即刻話畀佢知情況，叫佢快啲黎，點知佢答我...
「啱啱探咗喇喎」
我心諗what?!?!啱啱明明好傷心㗎喎! 然後再講
「吓但你老公真係差唔多要走喇喎」
佢再問我
「咁佢依家走咗喇？」
「咁又未...但血壓已經好低喇」
「哦...好啦好啦」
個語氣完全感覺到佢覺得我好煩🤐
收線之後我再去望望病人
竟然見到佢眼角有滴眼淚🥲🥺十足睇緊電視劇咁
雖然理性啲諗只係巧合 但當時見到真係覺得佢好慘🥺
兩個鐘後病人就無咗心跳呼吸，佢老婆都係無出現過
我臨落更前再打多次畀佢老婆問佢其實仲黎唔黎
佢無好確實答我黎唔黎 只係話好啦好啦
最終佢有冇黎 我就無問了
呢件事好多地方我都有好大感觸
唔知大家睇完有咩感覺呢？
Search